Управниот одбор на „Енвидиа“ се состанува за да разговара за евентуална смена на извршниот директор Џенсен Хуанг, по извештаите за две вонбрачни афери, од кои едната, наводно, била со жена за која постои сомневање дека е кинески шпион. Во круговите блиски до администрацијата на Трамп постоеле очекувања дека тој ќе биде сменет.
Бидејќи нема очигледен наследник, евентуалното заминување на Хуанг би создало вакуум во раководството на компанијата за производство на чипови, чија пазарна вредност изнесува околу 4 билиони долари.
Хуанг (63) поседува околу 3,6% од акциите на „Енвидиа“ и има десетици директно подредени соработници, што укажува на цврстата контрола што ја одржува врз компанијата, која ја основаше пред повеќе од три децении.
Акциите накомпанијата паднаа за околу 8% во тргувањето по затворањето на берзата во средата, продолжувајќи го падот со кој оваа недела беше избришана пазарна вредност од околу 600 милијарди долари.
Во допис до вработените испратен во неделата, Хуанг призна дека ѝ бил неверен на сопругата, преземајќи целосна одговорност, но без да наведе детали за врската.
Управниот одбор на „Енвидиа“ покрена истрага за да утврди дали Хуанг бил цел на операција на странска разузнавачка служба. Американскиот претседател Доналд Трамп изрази поддршка за првиот човек на „Енвидиа“, нарекувајќи го чесен човек кој направил неверојатна работа за својата земја.
„Њујорк тајмс“ доцна вчера објави дека постојат гласини дека извршниот директор на „Енвидиа“, Џенсен Хуанг, имал врска и со Кимберли Пауел, потпретседателката за здравство во компанијата. Ова е втор пат оваа недела да се објават обвинувања за афера на Хуанг, откако неговата сомнителна врска со кинеска шпионка се појави на меѓународни вести.
Пауел е во „Енвидиа“ од 2008 година, каде што го надгледува здравствениот бизнис на компанијата кој вклучува хардверски и софтверски платформи за забрзано пресметување, вештачка интелигенција и визуелизација што го напојуваат екосистемот на медицинско снимање, биолошки науки, откривање лекови и аналитика на здравствената заштита“, според нејзината биографија на веб-страницата на компанијата.
