Денеска во 19 часот во Македонскиот културно – информативен центар во Белград ќе биде претставена самостојната изложба на скулпторот Ангел Коруновски насловена „ Лица“.
Серијата платна и скулптури кои Коруновски ги изложува пред белградската публика е уметниковото видување на незабележителните лица на глобализацијата – анонимните, занемарените и замолчените поединци кои се движат низ сложеноста на глобализираниот и наметнато корумпиран свет.
Изложбата ќе ја отворат директорот на КИЦ Белград Васко Шутаров и Јасминка Намичева, а истата ќе биде изложена до 30 март.
Претставувањето пред белградската публика е благодарение на подршката од МКИЦ Белград и Министерството за култура и туризам.
Коруновски преку синтеза на колаж, гест, акција и апстракција, во овие дела го визуелизира човечкото присуство кое постои под површината на модерната бучава. Секој портрет произлегува од слоеви на искинати весници – фрагменти од масовни медиуми кои го претставуваат огромниот тек на глобални информации. Самите материјали, некогаш носители на јавна вистина, се пренаменети во интимни, лични наративи.
Експресивните ознаки и дамки стануваат траги од емоции, отпор и преживување во рамките на системи кои постојано ја бришат индивидуалноста. Лицата се нецелосни, фрагментирани и делумно замаглени – отсликувајќи ја состојбата на оние кои се борат да останат видливи во свет кој ја мери вредноста преку потрошувачка и конформизам.
