Израелската војска соопшти дека уништила голем подземен комплекс управуван од Хезболах во јужен Либан.
Биле употребени повеќе од 1.000 тони експлозив за да уништат два тунела што се протегаат на повеќе од 2 км под гребенот Али Тахер. Експлозијата предизвика сеизмичка активност еквивалентна на земјотрес со магнитуда од 4,1 степени, според Американскиот геолошки завод.
Израелските сили ја презедоа контролата врз гребенот минатата недела по месеци борби со групата поддржана од Иран таму. Израелската војска окупира голем дел од јужен Либан, освоен по продолжувањето на конфликтот со Хезболах во март, објави Би-Би-Си.
Израелските одбранбени сили соопштија дека подземната инфраструктура вклучувала команден центар што го користела единицата Бадр на Хезболах и содржела десетици ракети, проектили и беспилотни летала, како и противтенковско оружје, мини и експлозиви.
„Ова беше стратешка инфраструктура што беше изградена во текот на две децении, финансирана и планирана од иранскиот терористички режим“, се вели во соопштението на Израелските одбранбени сили (ИДФ) на Телеграм.
Израелските одбранбени сили соопштија дека со уништувањето на комплексот е завршена мисијата за уништување на осум тунели и воспоставување „безбедносна зона“ во областа.
Најновата акција доаѓа во време на обновени борби во јужен Либан, каде што израелските сили ги проширија операциите против позициите на Хезболах и продолжуваат да го држат она што Израел го опишува како безбедносна зона во близина на границата.
Либанските медиуми објавија за нови израелски напади на други места на југот во четврток, вклучувајќи ги Набатие ал-Фавка и Мансури во округот Тир.
