Најмалку 20 лица загинаа по земјотрес со магнитуда од 7,7 степени по Рихтер и десетици последователни потреси што ја погодија источна Индонезија утрово. Цунами бранови помали од 1 метар беа регистрирани во неколку области на југоисточната азиска земја по потресот, а предупредувањето за цунами беше укинато околу три часа по земјотресот.
Спасувачите околу пристанишниот град Маумере пронајдоа 20 мртви, шест повредени и двајца заробени под урнатините, изјави Фатхур Рахман, раководител на агенцијата за спасување на градот. Маумере е главниот град во регентството Сика на островот Флорес на истокот од огромниот архипелаг на Индонезија.
Тимовите сè уште не стигнале до Нагекео, регионот најблиску до епицентарот, а комуникациските сигнали таму се засегнати, изјави Фатхур за Ројтерс. Обидите да се стигне до Нагекео со автомобил беа блокирани од лизгање на земјиштето, додека друг тим се обидуваше да оди со ферибот, рече тој.
Околу 2.000 жители на Нагекео се евакуирани, а пријавени се штети на голем број куќи, магацини и владини објекти, соопшти националната агенција за ублажување на катастрофи. Властите, исто така, пријавија сообраќајни метежи и прекини на електричната енергија што влијаеле на делови од регентството, соопшти таа. Гувернерот на покраината Источна Нуса Тенгара, Емануел Мелкиадес Лака Лена, на прес-конференција изјави дека најмалку пет лица загинале од уривање на урнатини додека спиеле.
Делови од зграда се урнаа во прашина и урнатини додека луѓето врескаа и трчаа по улицата, покажа видео на Фејсбук, потврдено од Ројтерс дека е од пристаниште во Маумере.
Силен потрес беше почувствуван низ Источна Нуса Тенгара, Западна Нуса Тенгара и делови од Јужен Сулавеси, а жителите во неколку области пријавија потрес што траеше околу една минута.
„Повеќето луѓе го почувствуваа потресот и се истрчаа од своите домови“, се вели во соопштение на властите.
Индонезиската агенција за геофизика BMKG го регистрираше првиот земјотрес во 4:58 часот наутро на длабочина од 15 км , по што следеа неколку последователни потреси.
Во 1992 година, истата област беше погодена од земјотрес со магнитуда од 7,5 степени, предизвикувајќи обемни разурнувања, соопшти агенцијата.
Индонезија се протега низ „Тихоокеанскиот огнен прстен“, високо сеизмички активна зона, каде што се среќаваат различни плочи на земјината кора, создавајќи голем број земјотреси и вулкани.
