Неколку едноставни активности или дури и спиење наместо гледање телевизија би можеле значително да го намалат ризикот од депресија во средната возраст, сугерира ново истражување.
Заменувањето на само еден час гледање телевизија со други активности, како што се спорт, рекреација, одење или спиење, може да го намали ризикот од развој на голема депресија. Ако половина час гледање телевизија го замените со спортување, ќе го намалите ризикот од депресија за 18 проценти. Кај постарите лица, оваа едноставна промена го намалува ризикот за речиси 30 проценти.
Слично намалување на ризикот од депресија е забележано кога еден час гледање телевизија е заменет со сон. Резултатите од истражувањето се објавени во стручното списание European Psychiatry.
„Овие наоди ја поддржуваат промоцијата на различни физички активности во оваа возрасна група. „Намалувањето на времето поминато пред телевизор може да биде особено ефикасна стратегија за јавно здравје за возрасните на средна и постара возраст. Иако не се пронајдени значајни ефекти кај младите возрасни, поттикнувањето на активен животен стил останува важно, бидејќи раната физичка активност го предвидува идното однесување“, изјавиле тие.
Експертите со години предупредуваат дека седечкиот начин на живот може да го зголеми ризикот од голем број сериозни здравствени проблеми, вклучувајќи дебелина, дијабетес тип 2, рак, па дури и предвремена смрт.
Тимот од Универзитетот во Гронинген вели дека не станува збор само за времето поминато во мирно седење. Ментално пасивните активности, како што е гледањето телевизија, може да го зголемат ризикот од депресија поради дисрегулација на допамин, поголема консумација на нездрава храна и социјална изолација.
Неодамнешна студија покажала дека секој дополнителен час гледање телевизија е поврзан со пет проценти зголемен ризик од депресија.
„Затоа, насочувањето кон гледањето телевизија, наместо вкупното време поминато во седење, може да понуди поспецифична и поефикасна основа за интервенции“, заклучил тимот.
Фото: Pixabay
