Администрацијата на претседателот Доналд Трамп подготви санкции против Меѓународниот кривичен суд и планира наскоро да ги објави, изјавија два извори запознаени со случајот. Овој потег би го засилил нападот врз глобалниот трибунал кој гони сторители на воени злосторства и геноцид ширум светот.
Администрацијата на Трамп не крие дека го презира судот и работи на негово поткопување. Американските власти бараат судот да се откаже од налозите за апсење на израелски лидери, како и од претходната истрага за постапките на американските војници во Авганистан.
Американскиот државен секретар Марко Рубио во јули најави кампања за изолација на судот, повикувајќи ги другите земји да се повлечат од трибуналот. Вашингтон веќе воведе санкции за голем број судии и обвинители на МКС, но досега се воздржуваше од воведување санкции против самиот суд, иако тој потег долго време се разгледува како една од опциите.
Стејт департментот не одговори веднаш на барањето за коментар.
Санкциите против судот се подготвени, велат изворите, иако точниот момент на нивното објавување останува неизвесен. „Волстрит џурнал“ цитираше официјални лица кои изјавија дека одлуката би можела да биде финализирана уште оваа недела, за време на заседанието на Генералното собрание на Обединетите нации.
Директното таргетирање на целата организација, како и на субјектите што соработуваат со неа, би можело сериозно да ја попречи работата на судот.
Сите санкции насочени кон организацијата во целина, воведени од Министерството за финансии на САД, би им забраниле на американските граѓани и компании да обезбедуваат средства, стоки или услуги за судот без дозвола од Канцеларијата за контрола на странски средства (OFAC) при Министерството за финансии. Банките честопати претерано ревносно ги почитуваат ваквите американски санкции бидејќи зависат од пристапот до американскиот финансиски систем.
Меѓу активностите на судот што би можеле да бидат погодени од санкциите против целата организација се набавката на ИТ-услуги и осигурување, ангажирањето истражители и спроведувањето на секојдневните финансиски трансакции, како што е исплатата на плати за десетици американски вработени – на што предупредија секретарот и претседателот на МКС.
Противењето на Трамп кон судот датира уште од неговиот прв мандат. Тоа повторно излезе на виделина со планот за казнување на функционерите на МКС – идеја развиена во ноември 2024 година, кога Трамп беше реизбран, а МКС издаде налог за апсење на Нетанјаху поради наводни воени злосторства и злосторства против човештвото во конфликтот во Газа. Меѓународниот кривичен суд (МКС) беше основан во 2002 година од страна на меѓународната заедница за гонење на воени злосторства, геноцид и злосторства против човештвото. Тој ја остварува својата надлежност само доколку земјата-членка не е во можност или не сака самата да ги гони сторителите на таквите злосторства. Соединетите Држави никогаш не биле членка.
Администрацијата на Трамп подготвува санкции против Меѓународниот кривичен суд
