Инклузивен настан со лица со интелектуална попреченост ќе се одржи вечерва, со почеток во 19:00 часот, во Центарот за култура Ѓорче Петров.
Како што информираат од Театар Пи, ма настанот ќе има поставка на фотографии и музички концерт на кој ќе настапуваат лица со интелектуална попреченост од ЦПЛИП Порака Скопје заедно со професионални музичари: Виктор Танасковски- гитара, Иван Трајковски- пиано, Драгана Марковиќ-виолина, Диана Маркоска – виолина, Верица Ајтовска – виола, Ива Дамјановски – теремин, Ема Ананиевска-пиано, Златко Митрески-бас гитара.
Фотографиите и концертот се создадени како дел од целогодишни работилници во рамките на кампањата за инклузија на лица со интелектуална попреченост – ФИЗИКА НА РАДОСТА.
„Оваа година креиравме долго, тивко, искрено. Низ театар, музика, фотографија, разговори… Низ лични лавиринти што секој ги носи во себе.
Ова што ќе го видите е дел од процесот на Театар Пи за новиот мултимедијален концепт „Физика на радоста“ – каде учесници со типичен и атипичен развој заедно создаваат, учат и поминуваат низ целиот процес“, велат од Театар Пи.
„Инспирацијата доаѓа од делото „Физика на тагата“ на Георги Господинов, но ова е наша приказна.
Проектот е дел од кампањата за вклучување на лица со интелектуална попреченост, заедно со лица со типичен и атипичен развој во културата и социјалниот живот, во соработка со ЦПЛИП Порака Скопје“, додаваат од Театар Пи.
