Чоколадната фантазија е добар избор кога сакате едноставен колач од чоколадо и пандишпан. Во овој рецепт нема јајца, па дури и оние кои се алергични на оваа намирница можат да уживаат во него.
Рецептот го најдовме на YouTube каналот „Recepttura“, каде што е користен калап со димензии 24 x 24 сантиметри.
Состојки за бисквитот:
300 грама брашно
една кесичка прашок за пециво
300 грама шеќер
20 грама какао
400 милилитри јогурт
100 милилитри масло
Состојки за преливот:
80 милилитри млеко
100 грама путер
120 грама шеќер
100 грама чоколадо за готвење
Подготовка:
Во сад измешајте брашно, шеќер, прашок за пециво и какао. Потоа додадете половина од јогуртот и матете со миксер. После тоа, додадете го преостанатиот дел од јогуртот и продолжете да матите. На крај, додадете го маслото и добро измешајте ги сите состојки.
Добро намастете ја тавата или калапот и посипете со брашно. Истурете ја смесата за бисквити и печете во загреана рерна на 220 степени 30 минути. Кога ќе биде готова, извадете ја од рерна и оставете ја да се олади околу десет минути. Во тоа време, направете го преливот.
Истурете млеко во мало тенџере, додадете путер, шеќер и чоколадни трошки. Загревајте на тивок оган, мешајќи постојано за да се стопат сите состојки и да се соединат. Кога сè ќе се стопи и соедини, продолжете да мешате и варете на тивок оган додека смесата не се згусне.
Додека е сè уште во тавата, исечете го бисквитот на помали парчиња и прелијте го со топлиот прелив. Прво изладете го на собна температура, а потоа оставете го во фрижидер најмалку четири часа.
Фото: Принтскрин/YouTube
