На плоштадот Славија во Белград вчера се одржа последниот предизборен митинг во пресрет на вонредните парламентарни избори закажани за недела, 25 октомври, во организација на „Студентската листа – Студенти победуваат“.
Кон Славија граѓаните се упатија во организирани колони од шест различни правци низ Белград. Колони тргнаа од Нов Белград, Земун и Чукарица, а подоцна и од Студентскиот плоштад, од зградата на Техничките факултети на Булеварот „Крал Александар“ и од Автокоманда, објави Н1.
Кандидатите на „Студентската листа“ и студентите кои ја поддржуваат на завршниот митинг порачаа дека на изборите нема да се избира меѓу 18 изборни листи, туку меѓу две начела и две визии за Србија – „Србија или мафија; слобода или ропство; процут или пропаѓање“.
На митингот, кандидатите за пратеници говореа за тоа како според нив, треба да изгледа Србија од 26 октомври, ден по изборите.
Меѓу нивните заложби се ослободување на судството и обвинителството, како и обезбедување еднаква достапност на образованието и здравството за сите граѓани.
По завршувањето на митингот, сите кандидати на „Студентската листа“ се симнаа од бината и им се придружија на граѓаните.
На митингот му претходеа повеќедневни студентски маршеви од различни делови на Србија. Студенти од истокот, западот и северот на земјата пеш се упатија кон Белград, каде што синоќа беа пречекани пред Ректоратот.
Завршниот собир на Славија се одржа под мотото „Победата те повикува“, во пресрет на вонредните парламентарни избори на 25 октомври.
