Ракети го погодија Киев во раните утрински часови во четвртокот, изјави сведок за Ројтерс, додека Украина во текот на ноќта испрати стотици беспилотни летала кон Москва. Двете страни продолжија со интензивни напади, и покрај најновите обиди на САД да посредуваат за ставање крај на војната.
Руските напади предизвикаа повреди кај 15 лица и оштетија инфраструктура на метрото на Јужниот мост преку реката Днепар во украинскиот главен град, при што беше ограничен и сообраќајот, соопштија властите во Киев. Овие напади уследија по уште еден напад врз градот во средата навечер, во кој беа повредени шест лица.
Во руски напад во регионот Харков, во североисточниот дел на Украина, загина една жена, а четворица други луѓе беа повредени, изјави регионалниот гувернер Олег Синегубов на Телеграм.
Беспилотно летало погоди и енергетска инфраструктура во областа Кременчук, во регионот Полтава, изјави локален функционер на Телеграм, без да наведе детали.
Кременчук, кој се наоѓа на реката Днепар, е значаен индустриски центар и седиште на една од најголемите рафинерии за нафта во Украина. Оваа област често е цел на руски напади, вклучително и нападот врз преполн трговски центар во 2022 година, во кој загинаа најмалку 21 лице.
Во Русија, две лица беа повредени во близина на Москва откако во текот на ноќта кон главниот град беа испратени 630 беспилотни летала, изјави градоначалникот Сергеј Собјанин на Телеграм. Поголемиот дел од дроновите беа соборени на голема оддалеченост, додаде тој.
Во градот Липецк – каде што се наоѓа голема челичарница, на околу 400 километри јужно од Москва – еден маж беше повреден откако беспилотни летала погодија станбени згради и медицинска установа, соопшти гувернерот Игор Артамонов на апликацијата Телеграм.
Русија ја нападна Украина во 2022 година, откако осум години претходно го анектираше полуостровот Крим од својот јужен сосед, вовлекувајќи ги двете нации во најсмртоносниот конфликт на европскиот континент по Втората светска војна.
Најновите напади се случија откако американскиот претседателски пратеник Стив Виткоф оваа недела одржа разговори со украинскиот претседател Володимир Зеленски и рускиот претседател Владимир Путин, со цел да посредува за завршување на конфликтот. Зеленски во средата изјави дека Украина го поддржува предлогот на САД за тристрани разговори со Русија и Соединетите Држави, на ниво на преговарачи, кои би се одржале што е можно поскоро, а од Кремљ соопштија дека Путин се согласил да продолжат мировните преговори со Киев, со посредство на САД, уште следниот месец.
Руски ракети го погодија Киев, повредени над 15 лица и оштетена инфраструктура
