Хакери преку ноќ ја зголемија температурата во фрижидерите и замрзнувачите во стотици француски супермаркети до 50 Целзиусови степени, предизвикувајќи пожари и расипување на храната.
Обвинителството во Париз во понеделникот соопшти дека напад од голем обем влијаел врз поврзани фрижидери во неколку големи синџири за продажба на храна низ Франција, што довело до загуби на храна и пожари.
Премиерот Себастиен Лекорну ѝ наложил на Националната агенција за сајбер-безбедност на Франција (ANSSI) да спроведе истрага, изјави лице од неговиот кабинет.
Франција се координирала со европските партнери бидејќи и други земји би можеле да бидат погодени, рече лицето, додавајќи дека властите проценуваат дали и други француски компании се изложени на ризик.
Феликс Ејм, виш аналитичар за разузнавање за сајбер-закани изјави дека погодени биле и Шпанија, Португалија, Полска, Германија и Белгија.
Карфур соопшти дека биле погодени 80 од нивните супермаркети, додека „Моропри“, кој управува со околу 490 продавници во Франција, наведе дека биле погодени 5% од нивните продавници.
Сопственикот на трговецот на мало „Интермарш“, соопшти дека фрижидерите во околу 150 од нивните продавници биле загреани до 50 Целзиусови степени во текот на шест часа преку ноќ. Портпарол изјави дека целата погодена храна била фрлена за да се елиминираат здравствените ризици.
Жителот на Париз, Герт де Клерк, бил сведок како вработени во „Интермарш“ во центарот на Париз фрлаат полни колички со одмрзната храна во огромен контејнер за отпадоци, додека растопениот сладолед се излевал од скршените пакувања на улицата.
Извршниот директор на задруга Доминик Шелшер, изјави дека и неговата групација на супермаркети била цел на нападот.
„Нападот врз опрема што е од суштинско значење за зачувување на свежите производи и за снабдувањето со храна на францускиот народ е од исклучителна сериозност и е без преседан“, напиша тој на платформата X.
Немаше непосредна проценка на загубите во целата индустрија, но извршниот директор на Интермарш, Тиери Котијар, изјави дека невидениот напад би претставувал загуби во износ од десетици милиони евра низ целата земја за еден ден.
Кристел Делберг, генерален директор на европското здружение за малопродажба Еурокомерц, изјави: „Овој инцидент ја нагласува важноста на отпорноста низ целиот синџир на снабдување“.
Ладните ходници на супермаркетите обично се управувани од контролни панели кои управуваат со фрижидерите и замрзнувачите на целата продавница и до нив може да се пристапи преку интернет, што им овозможува на компаниите за одржување да ги прилагодат од каде било.
Изворот близок до Лекорну рече дека ANSSI идентификувал ранливост во софтверот обезбеден од данската компанија Данфос, која изјави дека е свесена за инцидентите во Франција што влијаат на ограничен број системи за управување со ладење.
Засегнатите единици работеа со застарен фирмвер, изјавија од компанијата, додавајќи дека им е советувано на клиентите да ги ажурираат поддржаните системи со најновиот фирмвер и да мигрираат наследени системи кон решенија од тековната генерација.
