Тројца шефови на главните македонски тајни служби ја чинат Македонија 120 илјади евра годишно само за плати без другите трошоци кои ги прават како директори.
Ова го открива екс техничкиот министер за внатрешни работи Наќе Чулев според кого
за плати на директорите на трите државни агенции од безбедносниот сектор, само за еден месец граѓаните плаќаат речиси 10 илјади евра. Просечната плата на секој од нив согласно законски утврдениот коефициент и другите додатоци, е околу 3 илјади евра, на месечно ниво, објави Чулев.
,,Кога граѓаните едвај врзуваат крај со крај, вкупната сума која државата ја двои секој месец за плати за само три лица односно Директорите на Агенција за национална безбедност, Агенцијата за разузнавање и Оперативно техничката агенција, изнесува фантастични 600.000 денари. На годишно ниво, само за директорите на овие три институции се трошат речиси 7.200.000 денари. Платата на секој овие три директори е повисока дури од платата на Претседателот на државата и Премиерот.
Јас, вие и сите чесни и одговорни граѓани на Република Македонија, редовно и одговорно плаќаме даноци за енормно високите плати на лицата кои се поставени и работат исклучиво на спроведување партиски агенди и директиви, тргување со влијание, вршење притисок и следење на опозицијата, спроведување мобинг и закани врз вработените, неспроведување на законите, градење перцепција и клеветење кај меѓународната заедница дека опозицијата е анти ЕУ и пропагира и практикува македонски национализам и екстремизам, злоупотреба на процесот на издавање на безбедносни сертификати со цел елиминирање на политички неистомисленици …и уште многу други работи.
Сите ние плаќаме илјадници евра за плати на луѓето кои се возат во луксузни и скапи возила, кои имаат цела армија обезбедувања и возачи, јадат скапи ручеци и единствено нешто што направија се низата скандали поврзани со безбедносните сертификати, спорните државјанства и пасоши на белосветски криминалци и фактот дека го доведоа безбедносно – разузнавачкиот систем во катастрофално, лоша состојба во каква што не бил во изминатите 30 години, сериозно нарушувајќи ги безбедносните капацитети на Македонија кои имаат основна цел зачувување на уставниот поредок на државата и територијалниот интегритет”, порачува Чулев кој на местото на горенаведените бара да дојдат одговорни, едуцирани и докажани професионалци на раководни позиции со високи морални вредности и интегритет.
,,Тоа е критериумот кој го бара европската унија и НАТО. Астрономските плати се само начин на кој оваа власт продолжува да го осиромашува народот и да ја руши економијата на државата. Во услови на економска криза и сериозна сиромаштија, толку високи плати се уште една потврда за немањето грам срам и осет во редовите на политичките партии кои се дел од власта”, пишува екс техничкиот министер.
