Денес беше промовирана новата генерација дипломци и постдипломци на Факултетот за информатички науки и компјутерско инженерство (ФИНКИ) во состав на Универзитетот „Св. Кирил и Методиј“ во Скопје (УКИМ).
На церемонијата, министерката за образование и наука им порача да продолжат да стекнуваат знаења и вештини, како најдобар начин за остварување на нивните животни цели. Министерката се заблагодари на наставниот кадар, семејствата и најблиските кои се вградени во успесите на студентите.
„Најголемото признание денес го добиваат овие млади луѓе, за кои дипломата е завршување на едно поглавје и почеток на друго – академско, професионално, животно. Како министерка, посакувам да продолжите да живеете и работите овде, во својата земја, и да помогнете во нејзиниот развој. Тука сте најпотребни“, им рече министерката Јаневска на новите дипломци и магистри на ФИНКИ.
Јаневска најави „крупни промени“ насочени кон унапредување на квалитетот на високото образование. Според Министерството за образование и наука (МОН), во рамки на реформите се разгледуваат различни решенија, а меѓу нив е и тоа за гарантирано вработување на најдобрите студенти во една генерација, на јавните универзитети и научни установи.
Министерката за образование и наука кажа и оти ФИНКИ конечно ќе го добие новиот објект во текот на мандатот на оваа Влада и дека сите заедно треба да работат за да се реализираат заложбите за квалитетно образование и добра работа во Македонија.
Обраќањето Јаневска го заврши со изразување сочувство до семејството на починатиот студент на ФИНКИ во несреќата во Кочани. На повредените четворица студенти им посака поскоро закрепнување и продолжување на патот до остварување на поставените животни и професионални цели.
