Министерството за внатрешни работи апелира граѓаните да не наседнуваат на измами со лажни сообраќајки, преку кои измамници им бараат пари, туку веднаш да ги пријават во полиција. Од МВР информираат дека во последниот период се пријавени повеќе кривични дела измама, кои се извршени најчесто врз повозрасни лица, кои сторителите со телефонски јавувања ги доведуваат во заблуда дека се полициски службеници и од нив бараат пари за ослободување од кривичен прогон на нивни деца или внуци кои, наводно, непосредно пред јавувањето направиле сообраќајна несреќа со смртни последици.
„Измамниците ги контактираат жртвите најчесто на фиксен телефон, но има случаи каде што се контактирани и преку мобилен телефон со скриен број, а за да бидат поуверливи во позадина се слуша глас кој бара помош“, велат од МВР и посочуваат дека се преземаат мерки за расчистување на овие случаи.
